Listen here: BBC Radio Jersey Voices
En Jèrriais
Bouônjour bouonnes gens. Ch’r’est mé, Marianne Sargent, tchi vos présente la Lettre Jèrriaise chutte sémaine. Aniet, j’m’en vais pâler entouor mes cattes, un sujet heûtheux parmi les mauvaises nouvelles dé chu moment.
J’avons deux cattes. Ieune nommée Scampi et eune aut’ nommée Arnie. Il’ ont onze ans. Scampi est pus p’tite qu’Arnie. Les deux sont rîlyies. Arnie est néthe, grise et breune et Scampi est néthe, breune et jaune. Arnie est eune fil’ye comme Scampi mais jé n’savions pon don jé chouaîssînmes un nom pouor un garçon pouor lyi. Ged chouaîsîssit Arnie pa’ce qué sa méthe aimait Arnold Schwarzenegger dans l’s années huiptantes.
Quand Scampi ‘tait janne ou soulait grîmper et sauter alentou d’la maîson et quand oulle avait dans les sept s’maines ou s’câssit la gambe. Ou dut rester dans eune câsse pouor siêx s’maines. La pouôrre catte. J’crai qué l’expéthience lyi dêroutit l’chèrvé pa’ce qué achteu oulle est hardi nécessiteuse. Ou miaûne et miaûne et ou saute sus nos gambes. Oulle aime à s’assièthe auve nous. Ch’est l’temps seulement quand oulle est hardi contente.
Scampi ouït haut don ou n’a pon peux d’rein. Arnie est compliètement difféthente! Oulle est bein peûtheuse. Oulle est eune ‘scaredy cat’. Oulle a peux dé l’aspithateu et quand la télévision est trop haute. Ou n’aime pon la rithie ou la chant’tie. Duthant la Séthée d’Guy Fawkes ou s’fouôrre dans not’ chambre souos l’liet pa’ce qu’oulle est êpeûthée des feurs d’artifices.
Scampi est hardi pouôrrement. Oulle a inflammatory bowel disease. Don ou dait prendre onze boulets châque jour. Oulle est allèrgique au poulet ès aut’ viandes. Ou peut mangi du saumon en tinne auve des galettes espéciales seulement. Malheutheusement, oulle aime bein l’poulet, mais si ou lé mange ou vomit et sa souothis rendre l’âme (her pancreas gives up the ghost).
I’ y’a deux trais ans ou failli mouothit et acouo duthant chu Noué pâssé. Ou restit auve lé vétérinnaithe pouor deux s’maines d’vant Noué et eune aut’ aprés. Ou pèrdit du paids et ou dévint maigre comme un chent d’clioux. Eh bein, lé vet nos dit qu’oulle a la maladie d’chucre. Ma pouôrre p’tite fil’ye. Achteu ou dait prendre l’insulin deux fais par jour étout.
Comme mé, Arnie aime bein l’mangi. Oulle a ‘té à s’avantagi d’la situâtion auve Scampi et oulle a ‘té à mangi un tas d’galettes espéciales. Malheutheusement, oulle est bein b’sante achteu. Lé vét dit qu’ou dait mangi mains. Don, j’avons acaté un aut’ patchet d’galettes espéciales pouor les cats tchi sont trop gras. Scampi est bein malheutheuse achteu pa’ce qu’ou veurt mangi les galettes à Arnie. Il à ‘té nécessaithe d’acater des dgichons espéciales auve des couvèrcl’yes tchi s’ouvrent auve des bat’ties pouor empêchi les deux d’mangi les galettes d’l’autre.
Les deux ont gratté nos meubl’yes alentou d’la maîson et Scampi a vômi sus l’tapis dans l’parleux à touos buts d’camp. Scampi saute sus l’établyie dans la tchuîsinne et dans l’tumble drier étout. Mais malgré la peine, j’adore mes cattes. Scampi a ‘té à coté d’Harô d’pis i’ fut née. Oulle est sa miyeuthe amînne. Arnie s’couoche auve li toutes les niéts pouor eune histouaithe. Les deux s’assiethent sus nos g’nouors toutes les séthées. I’ sont là quand j’rarrivons siez nous. Quand j’sommes tristes i’ sont là. Vive la compangnie ès cats.
À la préchaine fais. Prennez soin dé vous mêmes et j’vos envyie mes milleurs voeux. À bi pouor achteu.
In English
Hello everyone. It is me again, Marianne Sargent, with your Lettre Jèrriais this week. Today I’m going to talk about my cats, a happy subject amongst all the bad news at the moment.
We have two cats. One called Scampi and one called Arnie. They are 11 years old. Scampi is smaller than Arnie. Both are stripy. Arnie is black, grey and brown and Scampi is black, brown and ginger. Arnie is a girl like Scampi but we didn’t know that when we chose a male name for her. Ged chose the name Arnie because his mum used to like Arnold Schwarzenegger in the eighties.
When Scampi was little she used to climb and jump all over the house and when she was about seven weeks old she broke her leg. She had to stay in a small cage for six weeks. The poor cat. I think the experience affected her a lot because now she is very needy. She miaows and miaows and jumps up on our legs. She loves to sit with us all the time. It is the only time she is happy and content.
Scampi is deaf and fears nothing. Arnie is completely different! She is full of fear. She is a ‘scaredy cat’. She is scared of the hoover and when the television is too loud. She doesn’t like laughing or singing. On bonfire night she hides in our bedroom under the bed because she is scared of the fireworks.
Scampi is very poorly. She has inflammatory bowel disease. So she takes eleven tablets a day. She is allergic to chicken and other meats. She is only able to eat tinned salmon with special biscuits. Unfortunately she loves chicken, but if she eats it she vomits and her pancreas gives up the ghost.
She has nearly died a few times and again this past Christmas. She stayed with the vet for two weeks before Christmas and then another week after. She lost weight and was diagnosed with diabetes. My poor little girl. Now she has to have insulin twice a day as well.
Like me, Arnie loves food. She has been taking advantage of the situation with Scampi and eating a lot of special biscuits. Unfortunately she is overweight now. The vet said she must eat less. So I bought a bag of biscuits for overweight cats. Scampi is very unhappy because she wants to eat Arnie’s new biscuits. We have had to buy special feeding bowls with automatic battery operated lids to prevent them eating each others’ biscuits.
They both scratch the furniture all over our house and Scampi vomits on our carpet in the living room fairly often. Scampi jumps on the kitchen worktops and in the tumble drier as well. But despite the bother, I love my cats. Scampi has been next to our son Harry since he was born. She is his best friend. Arnie goes to bed with him every night for a story. They both sit on our laps for the whole of every evening. They are here when we get home. When we are sad they are there. Long live the company of cats!
Until the next time. Take good care of yourselves and stay safe. Goodbye for now.